اعمالنا

الاحداث والمؤتمرات

امن المعلومات

العملات الرقمية

فوركس

إعلان أعلى الموضوع



السلام عليكم



اكو مقولة شهيرة تكول:
A user interface is like a joke. If you have to explain it, it’s not that good
(المابي حيل يقرة ترة جوة اكو لنكات اكمز عليهن)
اكو مشكلة عويصة منتشرة عدنة حاليا هية اهمال تصميم ال UI/UX.. بحيث اليوزر ينثول ولازم يركز ويدور على الشي الي يحتاجة..
خاصة برامج الشركات و بالبرامج الخدمية او ادارة يعني شغلتهة تكون عملية وسهلة الاستخدام مو مليانة الوان وكل صفحة شكل... تكول مال ثمانينات ما مصدكين يكدرون يطلعون الوان بالشاشة
واجهة المستخدم او البرنامج دائمة تلكاهة "زرق ورق"... والصور مو طبيعية والادوات مو واضحة..
تلكة الالوان ازرق واحمر واصفر وبنفسجي وبرتقالي كله فاقع لو فسفوري والجو محترك... الي يستعمل البرنامج شهر يصير بيه عمى الوان... 
وكل صفحة او قسم شكل الخيارات بمكان والجداول بمكان واليوزر كلشي ما يعرف اكو مشكلة او البرنامج معلك.. التحميل وين وصل يضل يفر باذانه وينتظر الفرج...
قبل لا تنفذ اي برنامج فكر بالشكل والالوان والصور والمعلومات العامة كلهة مهمة
# اول شي الLayout
يعني توزيع او تخطيط الواجهة مثلا: 
- فوك الهيدر او التوول بار بيه الاقسام الاساسية للبرنامج.
- على اليمين خانة الادوات حسب القسم او المحتوى.
- بالوسط المحتوى الاساسي.
- جوة بالفووتر بيه معلومات عامة مثل عدد الجداول حالة البرنامج حالة التحميل وغيرها من المعلومات الثانوية الي يحتاجهة المستخدم بس بنفس الوقت مو اساسية
مثلا حالة الاتصال بالسيرفر اذا كان برنامج مربوط بالانترنت او حالة البيانات اذا اكو مشكلة او تنبيه حتى لو كانت معلومات عامة او تافهة بالنسبة الك مثل حجم الداتابيس مثلا تبقة معلومات مفيدة وممكن تختصر وقت المستخدم خاصة من يواجه مشكلة 
بعد ما تقرر اسلوب التوزيع لازم يثبت بكل صفحاتك بحيث المستخدم من يستعمل البرنامج مرة وحدة وبصفحة او قسم واحد ما يحتاج يرجع يسال او يدور فلانشي وين.. وشلون... لان التقسيم ثابت وكلشي بمكانة وتصير العملية بديهية
# ثاني شي الالوان 
الالوان تكون موحدة يعني تختار مجموعة الوان متناسقة تكون ثابتة
والاهم من هذا كله لازم تكون مريحة للعين حتى المستخددم ما يتعب من الاستخدام لمدة طويلة 
يعني لا تخلي مثلا مربع على خلفية وتستعمل الوان متقاربة بحيث لازم الواحد يركز يلة يفرق بين المربع والخلفية دائما خلي الفرق واضح وممكن يتميز بسهولة من مسافة ولازم تحسب حساب الناس الي نظرهم ضعيف
بالنسبة لاختيار الالوان مثلا خل ناخذ الفيسبوك كمثال
3 الوان اساسية 
1 - لون الخلفيات ابيض و2 او 3 تدرجات الرصاصي الفاتح علمود الاختلاف بين الخلفية والمحتوى
2 - لون الكتابة اسود 
3 - لون الثيم او الفليفر الي هوة الازرق حتى ينطي روح للواجهة وممكن ينخبط وية لون الخلفية بشكل خفيف مثل الخلفية مال تعليقات حتى يسوي فرق
وياها فد لونين خاصة مثلا الرسائل الايجابية اخضر والسلبية احمر
الالوان لازم تكون ثابتة ومحددة القيمة مالتهن قبل لا تشتغل.. وما تستخدم لون خارج عن اللستة بدون سبب
اذا ماكو ببالك شي معين ممكن تستعين بموقع مثل
https://color.adobe.com/explore/most-popular/?time=all
من ادوبي تختار بيه الالوان وتشوف الالوان الي الناس مستخدمتهة تعدل شوية عليهن يعني شغلة ربع ساعة بالزايد تكون عندك palette مرتبة
او افتح الفوتوشوب مثلا وحط الالوان مربعات مثلا وشوف تتناسب لو لا مريحة للعين لو لا ؟
# ثالث شي الصور او الايكونات...
- الوان الصور او الايكونات لازم تكون من ضمن الوان البرنامج او قريبة عليهة حتى ما تطلع نشاز.
- القياس لازم يكون نظامي يعني مو صورة 200 في 200 اخلي البرنامج يجعصهة الى 150 في 200 وتطلع عبالك جيس لبن...
لو تتصغر حتى تتناسب وية القياس المطلوب لو اسويهة بطريقة بحيث ما يتغير ال aspect ratio مال الصورة.
- حاول الايكونات او صور الشعارات الخ.. تكون اكبر من الحجم المطلوب ب 50% على الاقل خاصة بالمواقع..
لانه اكو مستخدمين مسويين زووم سواء لضعف النظر او مثل ما نشوف بالجديد شاشة 13 لو 15 انش والرزلوشن عالي 4K مثلا ولاعبين بال DPI حتى تكبر المحتويات اذا الصورة مابيهة مجال تكبر راح تطلع مشوهة
# رابعا المعلومات
- اكثر شي الناس تضوج منه هوة الانظار خاصة بدون مبررات... حاول انه ما تخلي المستخدم ينتظر بدون ما يعرف السبب.. تحميل بيانات او اتصال بالانترنت اي شي يستغرق وقت حاول تخلي شي يبين انه البرنامج شغال مو صافن واذا اكو معلومات تكددر تعرضهة مثل وين وصل التحميل او يا خطوة وصلت العميلة اعرضهة بشكل واضح.
- لاتخلي مشكلة او ايرر بدون رسالة او طريقة توصلهة للمستخدم حتى لو كلشي مراح يفتهم منهة... خليلك كلمة كلمتين تفهمة شصار مختصر مفيد وخلي رقم الايرر وياها مثلا:
"Oops something went wrong.. database error: 456"
وخلي المعلومات الكاملة والتقنية ب فايل log حتى من تنجي تحل المشكلة تكدر تحصل التفاصيل كاملة... اهم شي البرنامج ما يوكف بدون تفاعل والمستخدم يضل يفر براسة..
- المستخدم وخاصة الموظفين بالشركات يحب يحس روحه ذكي ويعرف كلشي متعلق بشغلة لذلك مهما كانت المعلومة تافهة او ثانوية بالنسبة الك ممكن تكون مهمة عنده او على الاقل مفيدة وممكن حتى يستخدمهة بملف او اجتماع ويحصل ترقية من وراها وطول ما المستخدم فرحان والبرنامج سهل ومختصر الشغل ويحس روحة عظيم من يستخدمه راح يحبك اكثر ويتعامل وياك اكثر واكثر
طبعا الUI/UX بيه بعد كومة تفاصيل ومفاهيم وحتى معتقدات وطائفية همين لذالك هاي البوست تحجي بشكل عام وما تغطي كل الافكار والتوجهات..
شوية لنكات لاكثر من بحث وفلسفة لشركات غنية عن التعريف 
اول شي كتاب لطيف جدا مفيد و مجاني:
https://ustwo.com/…/the-ustwo-pixel-perfect-precision-hand…/
PDF: http://cdn.ustwo.com/PPP/PP3.pdf
Google Material Design:
https://material.google.com/
Android Design Principles:
https://developer.android.com/d…/get-started/principles.html
Microsoft UWP:
https://msdn.microsoft.com/win…/…/layout/design-and-ui-intro
Apple IOS:
https://developer.apple.com/…/h…/overview/design-principles/
Apple OSX:
https://developer.apple.com/…/Co…/OSXHIGuidelines/index.html
IBM Design:
http://www.ibm.com/design/
BBC Global Experience Language:
http://www.bbc.co.uk/gel
MailChimp Design:
https://ux.mailchimp.com/patterns/

ليست هناك تعليقات:

إرسال تعليق

اسعار العملات

إعلان أسفل الموضوع